Helstu breytingar á fylgi flokka milli seinni hluta ágústmánaðar og fyrri hluta september er að fylgi Framsóknarflokksins eykst um rúmlega þrjú prósentustig, en næstum 13% segjast myndu kjósa flokkinn færu kosningar til Alþingis fram í dag. Þetta er mesta fylgi sem flokkurinn hefur mælst með síðan í janúar 2015. Slétt 22% segjast myndu kjósa Sjálfstæðisflokkinn og mælist fylgi hans rúmlega tveim prósentustigum lægra en í síðustu mælingu þó lækkunin nái ekki að vera tölfræðilega marktæk. Litlar breytingar eru á fylgi annarra flokka, eða á bilinu 0-0,6 prósentustig. Nær 12% segjast myndu kjósa Vinstri græn, rösklega 11% Pírata, 11% Samfylkinguna, næstum 10% Viðreisn, nálega 8% Sósíalistaflokk Íslands, tæplega 8% Miðflokkinn, um 5% Flokk fólksins og 0,5% Frjálslynda lýðræðisflokkinn.
Næstum 10% taka ekki afstöðu eða vilja ekki gefa hana upp og tæplega 7% segjast myndu skila auðu eða ekki kjósa.
Liðlega 57% þeirra sem taka afstöðu segjast styðja ríkisstjórnina.
Fylgistölur eru reiknaðar út frá svörum við fjórum spurningum:
- „Ef kosið yrði til Alþingis í dag, hvaða flokk eða lista myndir þú kjósa?"
- Þeir sem voru óákveðnir voru spurðir: „En hvaða flokkur eða listi yrði líklegast fyrir valinu?”
- Þeir sem enn voru óákveðnir voru spurðir: „Hvort er líklegra að þú kysir Sjálfstæðisflokkinn eða einhvern hinna flokkanna?”
- „Styður þú ríkisstjórnina?”
Niðurstöður sem hér birtast um fylgi flokkanna á landsvísu eru úr netkönnun sem Gallup gerði dagana 30. ágúst til 12. september 2021. Heildarúrtaksstærð var 5.828 og þátttökuhlutfall var 51,1%. Vikmörk á fylgi við flokka eru 0,8-1,6%. Einstaklingar í úrtaki voru handahófsvaldir úr Viðhorfahópi Gallup.
